Búseti byggir minni íbúðir í samræmi við þarfir

Búseti er nú að hefja byggingu á 72 íbúðum í Árskógum í Mjóddinni og tóku Dagur B. Eggertsson borgarstjóri og Bjarni Þór Þórólfsson, framkvæmdastjóri Búseta, fyrstu skóflustunguna að fjölbýlishúsunum fyrir helgi.

Í Árskógum 5-7 byggir Búseti 72 íbúðir í tveimur byggingum. Um er að ræða fjölbýli með stúdíóíbúðum og tveggja og þriggja herbergja íbúðum. Við hönnun var horft til þess hafa íbúðirnar í minna lagi þar sem hver fermetri er vel nýttur og mæta þær þannig óskum félagsmanna.

Húsin eru vel staðsett hvað varðar samgöngur og munu íbúar njóta góðs af fjölbreyttri þjónustu í næsta nágrenni. Í nýbyggingum Búseta er gætt að áherslum samtímans í hönnun hvað varðar reiðhjól og rafhleðslur fyrir bíla. Búseti hefur samið við Jáverk um byggingu húsanna. Framkvæmdir hefjast á næstu dögum og er áætlað að íbúðirnar verði tilbúnar á miðju ári 2021. A2F arkitektar eru aðalhönnuðir verkefnisins.

Búseti mun auk þessa afhenda tuttugu nýjar íbúðir við Skógarveg í Fossvogsdal í lok þessa árs. Á Keilugranda í Vesturbæ Reykjavíkur byggir félagið 78 íbúðir sem verða afhentar á miðju næsta ári og þá er einnig hafin hönnun fjölbýlis með 30 íbúðum í Bryggjuhverfi.